MANILA, Philippines - Sugatan ang isang 45-anyos na pahinante ng fish delivery truck nang saksakin ng isa sa limang holdaper matapos pumalag ang una sa intersection ng Road 10 at Lakandula St., Tondo, Maynila.
Kasalukuyang nilalapatan ng lunas sa University of Santo Tomas Hospital ang biktimang si Marcelino Capitan, truck helper, ng Brgy. Sokol, Calamba City, dahil sa sugat na tinamo sa dibdib.
Natangay pa rin ng hindi pa kilalang mga suspek ang bag na naglalaman ng P100,000.
Sa ulat ng MPD-Station 2, dakong alas-2:20 ng madaling-araw nang maganap ang insidente nang matrapik umano ang minamanehong delivery truck (XTZ-724) ni Nicolas Trollano, 33, ng Calamba City, Laguna, kung saan sakay din ang truck helper na si Capitan.
Galing umano sa Navotas Fish Port ang nasabing truck nang harangin ng mga suspek at akyatin ang kanilang truck sabay tutok ng patalim kay Capitan ng isa habang ang apat pa ay kinukulimbat ang nasabing bag, mga wallet at cellphone.
Sinasabing pumalag si Capitan kaya siya tinarakan ng isa sa mga suspect.