MANILA, Philippines - Napatay ang 24-anyos na dating bilanggo sa kasong robbery matapos itong barilin ng di-kilalang lalaki sa panulukan ng Zobel at Radium Street sa San Andres, Maynila, kahapon ng madaling-araw.
Binawian ng buhay habang ginagamot sa Sta. Ana Hospital ang biktimang si John Julius Pamintuan ng Radium Street sa nasabing lugar.
Sa ulat ni PO2 Michael Maraggun ng Manila Police District-Homicide Section, bandang ala-1:30 ng madaling-araw nang makarinig ng sunud-sunod na putok ng baril ang mga residente sa lugar at nang usisain ay nakita ang biktima na duguan.
Isang Emilia Gutierrez ang nagmagandang-loob na isugod sa pagamutan ang biktima subalit namatay din ito dakong alas-4:52 ng umaga bunga ng matinding tama sa sentido.
Sa pahayag ng ama na si Rodrigo Pamintuan ng 16 Dapo Street, Zamora, Pandacan, Maynila, nakulong sa Manila City Jail sa kasong robbery ang biktima kung saan hindi na umuuwi ng kanilang bahay dahil nakikitira na lamang sa mga kaibigan.
Wala namang impormasyong nakuha ang pulisya mula sa mga residente para matukoy ang pagkakakilanlan ng gunman.