MANILA, Philippines - Sugatan ang 16-anyos na umano’y apo ng sikat na impersonator na si Willie Nepomuceno, gayundin ang 17-anyos na kaibigan nito nang pagbabarilin ng mga hindi kilalang lalaki na lulan ng isang sasakyan sa Marikina City, kahapon ng madaling-araw.
Tinamaan sa iba’t ibang bahagi ng katawan ang bikÂtimang si Sean Gabriel Nepomuceno, na ginagamot ngayon sa Amang Rodriguez Memorial Medical Center (ARMMC), habang tama lamang sa hita ang tinamo ng kaibigan nitong si Frank Raven Diocson, 17, na agad ding pinauwi matapos na mabigyan ng paÂunang lunas.
Batay sa ulat nina SPO1 Marion Maiso at SPO1 Gemma Merabueno ng Station Investigation and Detective Management Section (SIDMS) Marikina City Police, dakong alas-2:50 ng madaling-araw kahapon nang maganap ang krimen, habang ang mga biktima at dalawa pang kaibigan ay kagagaling lamang mula sa isang computer shop sa Bayan-Bayanan Avenue, corner Bugallion St., Brgy. Marikina Heights, Marikina City.
Bibili sana ng meryenda sa Angel’s Hamburger ang mga biktima nang biglang dumaan ang sinasakyang Ford Fiesta (TIO-181) ng tinatayang apat na suspek at pinaulanan sila ng bala na mula sa kalibre .45 at .40 na baril.
Nilapitan pa umano ng mga suspek ang mga biktima at sinipa bago sumakay muli ng sasakyan at humaÂrurot palayo.
Hinala ng mga awtoridad na posibleng mistaken identity lamang ang naganap dahil bago pa man makarating sa computer shop ang mga biktima ay nagkaroon na ng komosyon sa loob nito.