MANILA, Philippines - Bala ang sumalubong sa papauwi nang 27-anyos na lalaking sangkot umano sa serye ng holdapan at snatching na kagyat nitong ikinamatay sa Tondo, Maynila, kahapon ng madaling-araw. Kinilala ang nasawi na si Ricky Manzano, ng Brgy. 33, Zone 3 Wagas St., Tondo, Maynila. Tumakas naman ang suspect na sakay umano ng dilaw na motorsiklo, nakasuot ng itim na jacket, itim na pantalon at bull cap. Sa ulat, dakong alas-2:50 nang maganap ang insidente sa Quezon St., panulukan ng Perla St., sa Tondo habang naglalakad ang biktima nang biglang salubungin ng suspect at walang sabi-sabing pinaputukan ito sa ulo. May teorya ang mga awtoridad na pinatahimik ang biktima dahil sa pagiging kawatan umano o pwede rin umanong isa sa kanyang naging biktima ang may pakana. (Ludy Bermudo with trainee Pinky de Leon)