MANILA, Philippines - Hinahanting ngayon ng mga tauhan ng Caloocan City police ang isang barangay chairman matapos nitong mabaril at maÂpatay ang isang mister makaraang sitahin ng huli ang una sa walang tigil na pagbusina ng kanyang sasakyan kahapon ng madaling-araw sa lungsod.
Dead-on-the-spot sanhi ng tama ng bala sa ulo si Wilfredo Diwa, 54, ng L. Nadurata St., ng naturang lungsod.
Pinaghahanap naman ng mga pulis ang chairman ng Brgy. 136, Bagong Barrio, Caloocan na si Othelo Ocampo.
Sa ulat ng Caloocan City Police, naganap ang insidente dakong alas-3:42 ng madaling-araw sa tapat ng bahay ng biktima nang ipinarada ng suspect ang kanyang sasakyan at walang tigil ito sa kakabusina upang tawagin ang apat na taong gulang na anak na lalaki.
Nagising at nabulahaw ang biktima na naging dahilan upang labasin at sitahin nito ang suspect. Hindi pinansin ng suspect ang biktima at bumaba ng sasakyan bago pinuntahan ang pinag-iwanan sa anak.
Makalipas ang ilang sandali ay bumalik ang suspect kasama ang anak at nang makita ang biktima na nasa tabi ng sasakyan ay nagbunot ng baril si Ocampo bago pinutukan si Diwa na dahilan ng agaran nitong kamatayan. Matapos ang insidente ay mabilis na tumakas ang suspect.