MANILA, Philippines - Idineklara ng mga barangay leaders at residente ng ika-apat na distrito ng lungsod ng Maynila na ‘Mayor Lim Country’ ang lugar dahil na rin sa solidong suporta ng mga ito sa itinuturing nilang ‘true-blue Manilan’ .
Sinabi nina dating Liga ng mga Barangay vice president Naning Ponce at Jason Valencia, na humawak ng sensitibong posisyon noong panahon ni dating Manila Mayor Lito Atienza, mas binibigyan nito ang Manilenyo ng pagkakataon na pumili ng tamang hahawak sa Maynila. Anila, si Manila Mayor Alfredo Lim lamang ang maituturing na karapat dapat na pamunuan ang lungsod.
“Matatalino at bukas ang mga mata ng mga taga-Maynila sa kung sino ang tunay na taga-Maynila, sino ang may nagawa para sa Maynila at sino ang may magagawa pa, kaya hindi na ubra ’yung puro paninira tapos wala namang maipakitang nagawa o gagawin pa para sa mga taga-Maynila,†ani Ponce.
Aniya ang nais na marinig ng mga tao ay kung ano ang nagawa at gagawin ng isang kandidato para sa taga-Maynila, hindi `yung puro paninira lang.
Tiniyak naman ni Lim na hindi niya bibiguin ang Manilenyo kung saan itutuloy lamang niya ang kanyang pagbibigay serbisyo sa mga mahihirap kabilang na ang programang ‘womb to tomb’ program kung saan ang serbisyo ay ibibigay simula sa pagkapanganak hanggang sa pagpapalibing.