14 pang Metro cops, sinibak

MANILA, Philippines - Nasa 14 pang pulis  ang sinibak sa tungkulin ni National Capital Regional Police Office (NCRPO) Director Leo­nardo Espina dahil sa mga kasong kriminal at administratibong kinaka­harap ng mga ito.

May 44 pulis rin ang kanyang pinatawan ng parusa dahil sa iba’t- ibang pagkakasala. Kasabay nito, nasa 21 pulis na malinis ang rekord ang binigyan ni Espina ng “Medalya ng Mabu­ting Asal” at nasa 838 medalya rin ang iginawad sa mga masisipag na tauhan ng pulisya.

Sa kabuuan, nasa 109 pulis Metro Manila na ang napapasibak ni Espina, 208 ang pinatawan ng iba’t-ibang parusa habang nasa 7,261 namang pulis ang binigyan ng medalya dahil sa pagseserbisyo ng tapat at masipag mula nang umpi­sahan ang kampanya sa pagwalis sa mga bugok na pulis at pagkilala sa mga mabubuti noong Set­yembre 7, 2012.

Ipinaliwanag ni Espina na ang Me­dalya ng Mabuting Asal (Good Conduct Medal) ay ibinibigay sa mga pulis na walang masamang rekord, walang kasong administratibo o kri­minal na isinampa sa kanila sa loob ng limang taong serbisyo sa PNP.

Binigyan naman ng Medalya ng Kasanayan o Posthumous Awards sina P/Chief Insp. Ferdinand Rosario at Po1 Edgar Valdez Jr., na kapwa namatay sa serbisyo.

Nakaduty umano sa moni­­toring ng mga bus marshall nitong Semana Santa si Rosario nang maaksidente sa South Luzon Expressway habang inatake ng stroke si Valdez habang hinahabol ang isang holdaper sa Sta. Mesa, Maynila.

Show comments