MANILA, Philippines - Patay ang isang hinihinalang holdaper nang kuyugin ng taumbayan makaraang mangholdap sa isang pampasaherong dyip sa Sta. Ana, Maynila kahapon ng madaling-araw.
Inilarawan ang biktima na nasa gulang na 18-20-anyos, may taas na 5’4’’, payat ang pangangatawan, nakasuot ng kulay itim na sando at puting jersey na shorts.
Ayon sa pulisya, dakong alas-3:00 ng madaling-araw nang maganap ang insidente sa panulukan ng Tenorio at A. Francisco Sts., Sta. Ana.
Nabatid na matapos makapanglimas ng mga mahalagang kagamitan at pera sa mga pasahero ng isang dyip ( DNA 744) ang suspect at mga kasamahang holdaper ay kaswal na naglakad ang mga ito sa isang eskinita sa nasabing lugar.
Nasaksihan naman ng isang barangay tanod na si Reggie Pangilinan, 37, ng Brgy. 790, Zone 86 District 5, ang panghoholdap ng mga suspect kaya ginamit nito ang silbato upang maalarma ang mga residente subalit hindi niya na nakita ang mga holdaper hanggang sa mabalitaan niya na kinuyog at napatay ang isa sa mga ito ng taumbayan.