MANILA, Philippines - Patay ang isang construction worker makaraang mahulog sa ikalawang palapag ng ginagawaan nitong gusali sa lungsod Quezon kahapon ng umaga.
Nakilala ang biktima na si Michael Ormita, 22, na naÂgawa pang maisugod sa San Juan Medical Center pero binawian din ng buhay dulot ng injury sa ulo at braso.
Nangyari ang insidente sa may likurang bahagi ng Magnolia residences na mataÂtagpuan sa Tower A-B, M. Domingo corner Doña Hemady, New Manila sa lungsod ganap na alas-8 ng umaga.
Base sa pahayag ng kasamahan ng biktima, nagpa-miting pa umano ang may-ari ng construction site sa mga trahabador hinggil sa safety precaution bago sila magsimula ng kani-kanilang mga trabaho.
Diumano, nasa ikalawang palapag ng Tower A si Ormita at kailangan nitong lumipat sa Tower B para doon magtrabaho, subalit kailangang dumaan sa tulay dahil magkalapit lamang ang distansya nito.
Pero sa halip gamitin ang tulay ay tinalon umano ng biktima ang kabilang gusali, sanhi para sumablay ito hanggang sa mahulog paibaba.
Dahil dito, agad siyang siÂnaklolohan ng mga kasamahan at itinakbo sa naturang ospital, subalit idineklara rin itong patay ganap na alas-9 ng umaga.
Patuloy ang imbestigasyon ng aworidad sa nasabing inÂsidente.