MANILA, Philippines - Patay ang 19-anyos na lalaki nang bistayin ng bala ng hindi pa nakilalang salarin, habang bumibili ng pagkain sa tindahan na katabi lamang ng isang barangay hall, sa Tondo, Maynila, kahapon ng madaling-araw.
Dead-on-arrival sa Tondo General Hospital sanhi ng tinamong tama ng bala sa iba’t ibang parte ng katawan ang biktimang si Kevin Joseph Canlas, walang trabaho, residente ng no. 782 Solis St., Gagalangin, Tondo, Maynila.
Pinaghahanap naman ang suspect na inilarawan sa edad na 32 hanggang 35, na armado ng di pa batid na kalibre ng baril at madalas umanong tambay sa lugar ng pinangyarihan.
Sa ulat ni PO3 Rodel Benitez ng Manila Police District-Homicide Section, dakong alas-2:30 ng madaling araw nang maganap ang pamamaril sa panulukan ng Cavite at Lucban Sts., Gagalangin, Tondo.
Bago ang pamamaril, bumili sa tindahan ang biktima na matatagpuan sa tapat ng Barangay Hall no. 167 nang magkatinginan umano ang biktima at suspect na nauwi sa pagtatalo.
Nang umawat ang pinsan ng biktima, nagalit pa lalo umano ang suspect at umalis panandalian at sa pagbalik ay may bitbit ng baril at mabilis na binistay ng bala ang biktima.
Nagawa pa umanong makatakbo ang biktima kasama ang kanyang pinsan ngunit bumagsak din ito at dinala sa nasabing pagamutan ngunit hindi na rin umabot pang buhay, habang ang suspect ay sinasabing agad na tumakas.