MANILA, Philippines - Dinakip ng pulisya ang isang African national matapos nitong hatawin ng kahoy sa ulo ang isang executive producer ng GMA-Channel 7 makaraang mapagkamalan itong kasama sa nandukot sa kanya, kamakalawa sa Makati City. Nakakulong ngayon sa Makati City Police ang suspek na si Kevin Novo Rivera, 38, nakatira sa Flovidel 1, Angeles City, Pampanga.
Samantala, nilapatan ng lunas sa Makati Medical Center (MMC) ang biktimang si Cliff Clyde Ambid, 37, nakatira ng Sampaloc, Manila at executive producer ng GMA-7.
Ayon sa pagsisiyasat ni SPO1 Rico Caramat, ng Station Investigation Division (SID), Makati City Police, naganap ang insidente dakong alas-4:15 ng hapon sa panulukan ng East at North Sts., katabi ng Glorietta 5, Brgy. San Lorenzo ng nabanggit na lungsod habang naglalakad ang biktima sa nabanggit na lugar papunta sa pinagparkingan ng kanyang sasakyan nang masalubong nito ang dayuhan.
Dito ay hinabol ang biktima ng suspek at walang sabi-sabing hinataw nito ng kahoy sa ulo ang una. Kahit sugatan ang biktima ay umiwas ito, subalit hinabol pa rin ito ng suspek at sinuntok. Dahil sa insidente ay rumesponde ang mga guwardyang naka-duty hanggang sa dinakip nila ang nasabing suspek at isinugod naman sa nabanggit na ospital ang biktima.
Ayon sa pulisya, pinagkamalan lamang ng suspek ang biktima na kasama sa mga nandukot sa kanya.