Nakalukso sa kalipay si Dario dihang gisugot siya ni Ines. Sa gidugayon nga usa ka tuig sa iyang pagpangulitawo sa dalaga karon pa gyud dawata sa dalaga ang dugay na niyang gihalad nga gugma. Ug tungod niini nga si Dario tipik na sa kasingkasing ni Ines, may gihangyo ang dalaga sa ulitawo. Ug ang maong gihangyo sa dalaga nakapasubo sa ulitawo.
“Unsa, Ines, dili na lang ko nimo paadtuon sa inyo? Uy, ngano man nga uyab na man ta,†dihay kalibog sa hunahuna ni Dario nga mipahayag ngadto sa iyang hinigugma. “Wa...wa ko kasabot nimo, Ines...â€
“Basta mao nay akong gusto, Dar, nga dili ka na mopatim-aw didto sa amo,†hinay ang tingog sa dalaga. “Ayaw lang og kabalaka, Dar, kay dili ko mangita’g lain. Kun ako ang mahigugma, pakamatyan ko ang maong gugma nako. Ikaw hinuon, basin og manguyab ka’g lain. Ingon ana ra ba mong mga lalaki, busgon sa pasalig kaming mga babaye, himanhiman diay duna nay laing hinigugma...â€
“Ikaw ra gyud og wa nay lain kong mahalon ning akong kasingkasing. Apan, naglibog ko nganong dili na man hinuon ko nimo pabisitahon sa inyo. Unsa man gyu’y imong katarongan, ha? Ines?†miigham si Dario.
“Nahibawo ka na man tingali, no, Dar, nga ang among pamilya gidudahan sa atong mga silingan,†mitutok si Ines kang Dario.
Mitutok usab si Dario kang Ines. “Unsa man nang dudaha?â€
“Nga kami kaliwat og mga ungo,†giliwag ni Ines ang iyang panan-aw didto sa nanagduwa nga mga bata duol sa nangulipyaw’ng mga salampati. Nia man gud sila karon sa parke. Ug kining maong parke atbang ra sa Basilica Minore del Santo Niño ug matawag usab nga mao kini ang ilang abotanan sa higayon nga gusto silang duha nga magkita.
“Oo, dugay na man kong nakadungog ana sa atong mga silingan, pero dili ko motuo, uy, Ines. Wala na man roy ungo. Niadto segurong karaang panahon, pero, karon wala na sa atong henerasyon,†ni Dario nga mipahayag. “Aw, duna man pero naa na sa mga salida sa sine, sa sugilanon sa komiks, nobela ug uban pa. Pero sa tinuod wala nay ungo rong panahona, di ba, Ines?â€
“Dunay ungo, Dario. Ug kami mga kaliwat og ungo. Mao bitaw nga dili ko ikaw paadtuon sa amoa, kay karon nga uyab na ta, ipakita gyud nilang tatay Bestri ug nanay Karya kanimo ang ilang hitsura sa higayon nga tua na ka sa amo mamisita nako,†milantaw si Ines sa karsada sa atbang.
“Dili. Kay lagmit mapusilan ta sa higayon nga molihok na ang among pagka-ungo,†kahilakon si Ines.
“Okey, ugma, kuyog ta, manimba ta sa Basilica. Mangayo ta’g tabang ni Señor Santo Niño, basin og dunay utlanan ang imong pagka-ungo, Ines,†ug giagbay ni Dario ang iyang tuong bukton sa abaga sa iyang minahal.
Wala’y tingog nga migawas sa baba ni Ines apan miyango kini. Tuod, didto na sila si Dario ug Ines sulod sa simbahan ug miapil sila kutay sa taas nga linya sa mga tawo nga buot mohawok ug unya mangaliya sa Balaang Bata. Unya, pag-abot gyud nila ni Dario ug Ines sa may Shrine ni Santo Niño mihawok dayon si Ines, sunod si Dario. Apan kalit nga nalup-og si Ines ug nakuyapan. Gidali ni Dario pagsakwat ang wala’y panimuot nga hinigugma ug gidala sa gawas. Gibati og kakuyaw si Dario, apan kalit lang may batang kulot nga miduol ug nakighinabi kang Dario. “Ayaw lang kabalaka, Kuya, kay maulian ra kanang imong uyab karong taudtaod ug gihikap sa bata ang agtang ni Ines. Unya kalit milit-ad ang dalaga ug mibangon nga mora’g gikutasan ug gipaningot pag-ayo.
“Dario, tana, mamauli na ta ug ihatod ko sa amo,†ni Ines pa naulian na. Tuod, didto sa balay nilang Ines miduol kang Dario ang inahan ug amahan sa dalaga. Si Noy Bestri ang misulti. Niya pa, “Dario salamat nga imong gikuyogan si Ines sa simbahan. Kay sukad karong adlawa, dili na siya parehas namo. Busa, mahimo mo na siyang minyoan. Apan, timan-i kini, ang una ninyong liwat, mamatay gayod, Dario...â€
Dinhi kahilakon si Dario nga naminaw sa gisulti sa amahan sa iyang hinigugma nga karon dili na ungo. (Kataposan)