Dear Dr. Love,
Ako po si Philip. Ang hirap talagang magmahal lalo na kung umaasa ka pa ring magkakabalikan kayo.
Ako naman talaga ang may kasalanan. Magulo rin kasi ang isip ko nun. Dala ng barkada at kabataan ko.
Dalawa ang aking anak. Nagkasundo na kami noon pero hindi pa rin ako tumigil. Nahiwalay ako uli.
Dumarating din na namimiss ko ang aking asawa’t mga anak. Pero hindi na nila ako kailangan ngayon. Pati ang mga magulang ng asawa ko ay ayaw na rin akong tanggapin.
Ang lalong kinalungkot ko, may kinakasama na siya ngayon. Kaso isang tomboy.
Kahit ipilit ko, wala na raw siyang nararamdaman sa akin. Masakit pero kakayanin ko.
Naging malabo na ang lahat para sa amin.
Philip
Dear Philip,
Kung nasasaktan ka ngayon ganyan din ang naranasan ng asawa mo sa iyo. Ipinaranas sa iyo ng tadhana ang kalungkutan. Huwag kang tumigil sa iyong pagdarasal, malay mo maging maganda ang ikot ng mundo para sa iyo. Ituloy mo pa rin ang iyong pakikipag-ugnayan sa kanila.
Kahit alam mong malabo na kayong magkabalikan ng asawa mo, tandaan mo ikaw pa rin ang tatay ng mga anak ninyo.
Kaya magsikap kang ayusin ang buhay mo at ang kabuhayan mo, para anuman ang mangyari ay maging ready ka. Hindi natin alam, baka kapag may direksiyon ka na ay magkaroon ng chance na mabuo ang iyong pamilya.
Magbago ka at magpakatino na.
DR. LOVE