Dear Dr. Love,
Itago mo na lang ako sa alyas na Techie, isang registered nurse na nagtatrabaho sa isang governÂment hospital.
Nakilala ko si Jimmy dahil isa siya sa mga pasyenteng inalagaan ko sa ospital.
Bata pa siya sa edad na 20-anyos habang ako’y 25-anyos na. Nagkaroon kami ng relasyon pero hindi ko alam na may asawa na pala siya.
Huli na nang malaman ko ang lahat. Nasa Amerika pala ang asawa niya. Hindi ko sukat akalain na sa batang gulang niyang ‘yun ay may misis na pala siya.
Nakipag-break ako sa kanya pero ayaw niya. Mahal daw niya ako at napilitan lang siyang magpakasal sa asawa niya dahil nilinlang siya nang sabihin nitong siya’y nagdadalantao.
Naguguluhan ako ngayon. Tulungan mo po ako.
Techie
Dear Techie,
Huwag mo nang pagulihan ang isip mo. Alam mo naman na ang pinakatamang magaÂgawa mo ay makipag-break sa kanya.
Mukhang wala pa sa wastong pag-iisip ang boyfriend mong iyan kaya paano ka liligaya sa ganyang lalaki?
Malay mo, sasapitin mo rin ang sinapit ng kanyang asawa.
Kaya payong kaibigan, makipag-break ka sa kanya.
Dr. Love