Dear Dr. Love,
Kung puwede’y hindi ko na babanggitin ang buo kong pangalan. Just call me Jovy, 25-anyos at isang single parent.
Nagkaroon ako ng boyfriend two years ago pero nag-break kami matapos niya akong mabuntis. Takot kasi siya sa responsibilidad.
Buong tapang kong tinanggap ang paghihiwalay namin. Para sa akin, siya ang nawalan at hindi ako. Nasa akin ang aming anak at iyan bagay na ipinagmamalaki ko.
Nagkaroon ako ng bagong boyfriend pero ang pakilala ko sa kanya sa anak ko ay isang pamangkin.
Sabi sa akin ng mga close friends ko, baka maging problema ko ang pagtatago ng lihim na ito. Dr. Love, natatakot akong magtapat sa boyfriend ko dahil baka iwanan niya ako. Ano ang gagawin ko?
Jovy
Dear Jovy,
Kung buong tapang mong nadispatsa ang una mong boyfriend, bakit hindi mo magawang sabihin ang totoo sa bago mong kasintahan?
Ang lihim, pakatagu-tago mo man ay lalantad din sa takdang panahon kaya mabuti pang ngayon pa lang ay ipagtapat mo na.
Kung tatanggapin niya ang katotohanang itinatago mo, tunay ang kanyang pag-ibig. Pero kung hindi, hindi ka niya totoong mahal kaya mawala man siya ay hindi mo dapat ipagdamdam.
Dr. Love