MANILA, Philippines — Dahil sa panganib ng lugar at sama ng panahon, nananatiling pahirapan ang pagbaba ng bangkay ng apat na lulan nang bumagsak na Cessna plane sa Bulkang Mayon.
Ito ang binigyang diin ni Camalig Mayor Irwin Baldo Jr. na siya ring incident commander sa isinasagawang retrieval operation.
Ayon kay Baldo, kailangang magdoble ingat ang rescue team dahil sa matarik na daan paakyat sa bulkan na sinasabayan pa ng malakas na hangin at mga pag-ulan.
Kinumpirma nito na nakita na ang bangkay ng apat na sakay ng eroplano subalit hindi pa mabatid kung kailan ito maibababa.
“Kapag ginagalaw nila nang kaunti yung bangkay nagdadausdos pababa ‘yung mga rocks doon kaya delikado po sa mga rescuers po natin,” ani Baldo.
Sa ngayon, sinabi ni Baldo na ang mga miyembro ng retrieval team ay magtatayo lamang ng mga anchor vault at mga lubid upang matiyak ang kanilang kaligtasan.
Kabilang sa sakay ng Cessna sina Captain Rufino James Crisostomo Jr., Joel Martin at mga foreign nationals na sina Simon Chipperfield at Karthi Santhanam.
Agad namang magpapalabas ng report ang investigation team oras na matapos ang isinasagawang imbestigasyon lalo na sa kung ano talaga ang dahilan ng pagbagsak ng Cessna 340 plane.