MANILA, Philippines — Umaabot sa 573 examinees ang kumuha ng Career Service Examination para sa Foreign Service Officer (CSC-FSO) sa 13 rehiyon kamakailan.
Ang nasabing bilang ay kumakatawan sa 89.39 % sa kabuuang registered examinees mula sa National Capital Region (NCR), Regions 1 hanggang 11 at Cordillera Administrative Region (CAR).
Sina CSC Chairperson Karlo Alexei Nograles at Commissioner Ryan Alvin Acosta ay nagsagawa ng pagi-inspeksiyon sa pagsusuri sa UST Angelicum College sa Quezon City, ang testing center sa NCR kung saan nasa 63% sa kabuuang 360 ng mga examinees ang kumuha ng pagsusulit.
“Isa na namang successful na Career Service Examination ang naihatid ng Civil Service Commission (CSC). Ito ay para naman sa mga Foreign Service Officer hopefuls. Nagpapasalamat kami sa lahat ng examinees sa kanilang cooperation sa exam protocols upang maging maayos ang buong exam procedure. Gusto rin naming magpasalamat sa mga partner schools namin,” saad ng CSC Chairperson Nograles.
Ang CSE-FSO (Career Service Examination-Foreign Service Officers) ay nagsisilbing qualifying test at eligibility examination.
Ipoposte ang pangalan ng mga nakapasa sa pagsusulit sa Marso 19, 2023 sa CSC website. Ang CSE-FSO ang kauna-unahang career service exam ngayong 2023.
Samantala, gagawin ang kauna-unahang face-to-face Career Service Examination-Pen and Paper Test (CSE-PPT) for Professional and Subprofessional levels ngayong taon sa Marso 26.