MANILA, Philippines — Inaprubahan na ng Kamara sa ikalawang pagbasa ang ‘Freelance Workers Protection Act” na magbibigay proteksyon, karapatan at dagdag na benepisyo sa mga freelance workers sa bansa.
Sa pamamagitan ng viva voce voting ay ganap na napagtibay ang House Bill (HB) 6718 o ang Freelance Workers Protection Act na pangunahing iniakda ni 2nd District Albay Rep. Joey Salceda, Chairman ng House Committee on Ways and Means.
Ayon kay Salceda, pangunahing layunin ng HB 6718 ay isulong ang proteksiyon, karapatan, kagalingan at mga pakinabang ng mga ‘freelancers’ kasama ang ‘mandatory hazard pay at night shift differential pay.’
Alinsunod sa HB 6718 ay poprotektahan at isusulong ang kapakanan ng mga freelance workers sa pamamagitan ng written contract sa pagitan ng employer at freelance worker.
Isasaad sa kontrata ang mga kundisyon sa pagtatrabaho, detalye ng kabayaran at mga benepisyo, panahon ng pagtatrabaho, mga kadahilanan sa paglabag sa kontrata, at iba pang mga kundisyon na itinakda ng Department of Labor and Employment (DOLE). Nauna nang naipasa ng Kamara ang panukala noong Marso 2021, ngunit hindi ito naisabatas.
Ayon kay Salceda, sa kasalukuyang Labor Code, walang kategoryang ‘freelance worker’ at wala ring paliwanag tungkol dito, bagama’t sa bansa mahigit 1.5 milyon na ang kanilang bilang bago pa nagka-pandemya.