MANILA, Philippines (Update, December 7) — Patung-patong na ang mga nais humarang sa kandidatura ni dating Sen. Ferdinand "Bongbong" Marcos sa 2022, dahilan para umabot ito sa tatlong magkakaibang itsura: cancellation, disqualification at pagpapadeklara bilang nuisance candidate.
Ito ang inilahad ni Commission on Elections (Comelec) spokesperson James Jimenez sa isang press briefing kasama ang media ngayong Huwebes.
Related Stories
"It's hard to say [if he's the most contested candidate in recent history], but in 2016 wala akong nakitang ganito karaming [kumukwestyon sa kandidatura]," sambit ni Jimenez sa mga reporters ngayong hapon.
"Walang ganito karami noong 2016 [national elections]."
Ang mga sumusunod ang sinasabing naghain na ng sari-saring petisyon laban sa kandidatura ni Marcos sa pagkapangulo sa ngayon:
- Fr. Christian Buenafe, et al. (cancellation/denial of certificate of candidacy)
- Bonifacio Ilagan atbp. Martial Law survivors (disqualification)
- independent presidential aspirant Tiburcio Villamor Marcos (cancellation)
- independent presidential aspirant Danilo Lihaylihay (declaration as nuisance candidate)
- Dr. Rommel Bautista, et al. (petition-in-intervention, cancellation)
- Akbayan party-list list, et al. (disqualification)
- Pudno Nga Ilokano, et al. (disqualification)
Matatandaang una nang ipinakakansela o "deny" ng ilang petitioners ang COC ni Bongbong Marcos dahil sa "pagsisinungaling" diumano ng anak ng diktador na si Ferdinand Marcos pagdating sa 1995 conviction pagdating sa hindi paghahain ng income tax return, bagay na nagdi-"disqualify" raw sa kanya tumakbo sa anumang posisyon sa gobyerno habambuhay sa ilalim ng National Internal Revenue Code.
Una nang minaliit ni Victor Rodriguez, tagapagsalita ni BBM, ang nabanggit na petisyon para sa cancellation. Hindi nasagot ng kampo ni Marcos ang petisyong ito hanggang dumating ang deadline. Gayunpaman, na-extend ito.
Getting word that COMELEC 2nd Div just now issued an extension in the cancellation case against former Senator Marcos. 5 days. But since the 5th day falls on a Sunday, last day is actually 22 Nov.
— James Jimenez (@jabjimenez) November 18, 2021
BBM bilang nuisance?
Maliban sa disqualification at cancellation ng COC, merong naghain ng petisyon para ideklarang "nuisance candidate" si Bongbong — ang presidential aspirant na si Lihaylihay.
Sa Section 69 ng Omnibus Election Code, sinasabing pwedeng ipetisyon ng sinumang "interested party" bilang nuisance candidate ang nag-file ng COC kung:
- nais gawing katatawanan (mockery) ang election process, pati na rin ang mga nais sirain ang magandang reputasyon nito (disrepute)
- layon nilang manlito ng mga botante dahil sa pagkakaroon ng malaking pagkakahalintulad sa pangalan ng iba pang rehistradong kandidato
- wala silang seryosong intensyon na tumakbo para sa posisyong hinainan ng COC
Kung mapapatunayang nuisance candidate ang isang tao, tatanggalin agad sa listahan ng mga eligible tumatakbo ang isang aspirant.
"None of these [nuisance] cases [for 2022] hase been resolved yet," patuloy ni Jimenez kanina.
Ipinakakansela ng isa pang Marcos
Kapansin-pansing kaapelido ni Bongbong ang isa sa mga nagpapakansela sa kandidatura ng standard bearer ng Partido Federal ng Pilipinas.
Ito'y mula kay Tiburcio Villamor Marcos na tumatakbo para sa parehong pwesto. Sa Omnibus Election Code, pwedeng tanggalin sa listahan ng mga kandidato ang nag-file ng COC na may matinding pagkakapareho ng pangalan sa isa pa. Ganunpaman, mas kilalang Marcos ang dating senador na nagsilbi na rin sa lokal na pamahalaan ng Ilocos Norte at bilang miyembro ng Kamara.