MANILA, Philippines — Tatangkain uli ng dalawang progresibong human rights lawyers ang kanilang kapalaran sa pagtakbo sa posisyon ng senador para sa susunod na halaang 2022.
Ika-7 ng Oktubre nang i-file ng senatoriables na sina National Union of People's Lawyers chairperson Neri Colmenares at Free Legal Assistance Group chairperson Chel Diokno ang kanilang certificates of candidacy sa Comelec.
Related Stories
Matatandaang sinubukan din nina Colmenares, na chair din ng militanteng Bayan Muna party-list, at Diokno na tumakbo sa pagkasenador noong 2019 ngunit bigong makasungkit ng pwesto.
"Kailangan masawatan natin ang patuloy na pagragasa ng COVID at ipaglaban sa Senado ang ayuda, trabaho, edukasyon at katarungan," ani Colmanares sa kanyang talumpati kanina.
"Ang ayaw gawin ni Duterte sa kabila ng kaliwa’t-kanang pangungutang, isasabatas natin: mula libreng COVID testing, hanggang sa pagpagamot ng iba’t ibang sakit na hindi mag-alala sa gagastusin."
#BilangPilipino2022 | Human rights lawyer and Bayan Muna chairperson Atty. Neri Colmenares files his COC for senator. This is Colmenares’ second attempt to seek a Senate seat. (via News5/@camillesmnte) pic.twitter.com/IndxN9zfEt
— ONE News PH (@onenewsph) October 7, 2021
Dagdag pa riyan, isusulong din daw niya ang panukalang libreng hospitalization para sa mga mahihirap, kabilang na ang paglalaan ng pondo para libre na ang konsultasyon, gamot at "medically necessary" na operasyon kasama na ang kidney transplant o chemotherapy.
Tututukan din ni Colmenares ang pagbabawal sa kontraktwalisasyon na makatutulong sa mga manggagawa, isang panukalang dati nang hinarangan ni Pangulong Rodrigo Duterte.
"Bilang isang abogado, isusulong ko rin sa Senado ang pagbigay ng hustisya sa lahat ng biktima ng human rights violations sa ilalim ni President Duterte at pagtugis sa mga mangungurakot, at korap sa gitna ng pandemya," dagdag niya.
"My Senate run is an expression of hope and struggle as part of the people’s movement for social reform."
'Padaliin pagkamit ng katarungan'
Layon naman ngayon ni Diokno na magtulak nang mas maraming reporma sa loob ng hudikatura.
Aniya, kung mabibigyan siya ng pagkakataon g maglingkod bilang senador, magtratrabaho siya para "mas madaling makuha ang katarungan at mapalakas ang mga alternatibo sa litigasyon sa korte," banggit niya kanina.
#BilangPilipino2022 | Atty. Chel Diokno files his COC for senator, after taking his oath as member of the KANP party. In his speech, the lawyer acknowledges criticisms with his teeth.
— ONE News PH (@onenewsph) October 7, 2021
"Maliit na bagay ang ngipin. Hindi ba dapat pag-isipan ang bungi at bulok na sistema?" pic.twitter.com/9ipdO8kG3r
Kamakailan lang nang manumpa siya sa partidong Katipunan ng Nagkaisang Pilipino. Anak din siya ng dating senador at human rights advocate na si Jose "Ka Pepe" Diokno, na kilalang lumaban sa diktadura ni dating Pangulong Ferdinand Marcos.
Pabiro din niyang sinagot ang mga bumabanat sa kanya, lalo na ang mga pinagtatawanan ang kanyang ngipin: "Maliit na bagay ang ngipin. Hindi ba dapat pag-isipan ang bungi at bulok na sistema?" wika ng kandidato.
Bagama't galing sa ibang partido, una nang pinangalanan ng Liberal Party si Diokno bilang kanilang guest senatorial candidate dahil sa mga pagkakahalintulad ng prinsipyo. — James Relativo at may mga ulat mula kay Gaea Katreena Cabico, News5 at ONE News