Villar, Pacquiao pinakamayaman pa rin sa Senado

MANILA, Philippines — Nananatiling pinakamayang senador sina Cynthia Villar at Emmanuel ‘Manny’ Pacquiao batay sa kanilang 2018 Statement of Assets, Liabilities and Net Worth na inilabas ng Senado.

Ang net worth ni Villar, na numero unong senador nitong katatapos lang na 2019 midterm elections, umabot sa mahigit P3.7 bilyon, habang P3 bilyon naman ang kay Pacquiao.

Tumaas ng mahigit P108.6 milyon ang net worth ni Villar habang P59 milyon naman ang itinaas ng kay Pacquiao.

Walang "liabilities" o pagkakautang si Villar habang mahigit P146 milyon naman ang sa boksingerong mambabatas na si Pacquiao.

Noong 2017, sina Villar at Pacquiao din ang lumalabas na may pinakamalaking net worth.

Ito na ang ikalimang magkasunod na taon na nanguna sa listahan si Villar.

Si Villar ang asawa ng dating Senate president at negosyanteng si Manny Villar at nanay din ni Public Works and Highways Secretary Mark Villar.

Itinuturing si Manny Villar bilang pinakamayamang Pilipino, ayon sa huling tala ng Forbes magazine ngayong 2019.

Pinagmamay-arian ng kanilang pamilya ang construction company na Vista Land at mall-chain na Starmall.

Pasok rin sa sampung pinakamayayamang senador sina Ralph G. Recto (P555 milyon), Juan Miguel F. Zubiri (P182.8 milyon), Juan Edgardo M. Angara (135.8 milyon), Joseph Victor G. Ejercito (132.8 milyon), Franklin M. Drilon (97.7 milyon), Sherwin T. Gatchalian (P96 milyon), Grace Poe (P93 million) at Richard J. Gordon (P71 milyon).

Nakalista sa ibaba ang net worth ng bawat senador na kasapi sa 17th Congress:

1. Cynthia A. Villar                                            3,719,941,858.00
2. Emmanuel D. Pacquiao                                3,005,808,000.00
3. Ralph G. Recto                                               555,324,479.82
4. Juan Miguel F. Zubiri                                      182,851,570.34
5. Juan Edgardo M. Angara                               135,840,710.00
6. Joseph Victor G. Ejercito                                132,820,345.73
7. Franklin M. Drilon                                            97,726,758.00
8. Sherwin T. Gatchalian                                     96,210,607.14
9. Grace Poe Llamanzares                                 93,039,921.54
10. Richard J. Gordon                                           71,285,178.56
11. Vicente C. Sotto III                                          70,120,700.30
12. Maria Lourdes Nancy S. Binay                        60,132,461.00
13. Loren B. Legara                                              56,290,602.11
14. Paolo Benigno A. Aquino IV                           45,205,138.25
15. Panfilo M. Lacson                                           42,442,341.00
16. Aquilino Martin L. Pimentel III                         28,662,212.00
17. Emmanuel Joel J. Villanueva                         26,921,555.00
18. Gregorio B. Honasan II                                   25,882,099.00
19. Francis N. Pangilinan                                      16,695,048.17
20. Ana Theresia N. Hontiveros-Baraquel           15,627,176.04
21. Francis Joseph G. Escudero                          10,575,228.00
22. Leila M. De Lima                                             7,706,392.45
23. Antonio F. Trillanes IV                                     7,533,012.10

Nananatiling pinakamahirap na senador pa rin si Antonio Trillanes IV, na mayroong P7.5 milyong net worth.

Gayunpaman, tumaas ito ng P661,268.46 kumpara sa nakaraang taon. 

Samantala, bumaba naman ng P238,681.24 ang SALN ni Sen. Leila De Lima. — Philstar.com intern Edelito Mercene Jr.