MANILA, Philippines – Nahaharap ngayon sa kasong kriminal at administratibo ang 29-anyos na opisyal ng pulisya matapos itong akusahan ng rape ng isang babaeng nagtratrabaho sa pabrika sa Calamba City, Laguna, ayon sa ulat kahapon.
Sa ulat ng pulisya na nakarating sa Camp Crame, kinilala ang akusadong opisyal na si P/Inspector Aaron Cabillan ng Regional Public Safety Battalion at nakatalaga sa Regional Intelligence Division.
Ayon kay P/Supt. Chitadel Gaoiran, spokesperson ng PRO IV-A, si Cabillan ay inaresto ng mga nagpapatrulyang tauhan ng Calamba City Police noong Lunes ng gabi matapos na maaktuhan itong hubo’t hubad kasama ng babaeng biktima sa loob ng nakaparadang sasakyan sa gilid ng kilalang mall sa Brgy. Canlubang.
Dito na humingi ng tulong sa mga operatiba ang biktimang itinago sa pangalang Melissa na nagsabing puwersahan siyang ginahasa ng suspek.
Sa salaysay ng nasabing ginang, dakong alas-11 umano ng gabi habang naghihintay siya ng masasakyan pauwi sa Brgy. Paciano nang mapadaan si Cabillan at puwersahan itong pinasakay sa kaniyang sasakyan.
Ayon sa ginang, wala siyang nagawa matapos na umano’y tutukan ng baril ng suspek saka halayin hanggang sa masaklolohan ng mga nagpapatrulyang operatiba ng pulisya.