BULACAN, Philippines – Patay ang 46-anyos na drug pusher matapos itong ratratin ng dalawang hindi kilalang lalaki sa loob ng kanyang bahay sa Barangay Tigbe, bayan ng Norzagaray, Bulacan kahapon. Dalawang tama ng bala sa ulo ang tumapos sa buhay ni Raymund Mateo ng nasabing barangay. Base sa ulat ni PO3 Rodolfo Santos na nakarating sa Camp Crame, nasa kusina ng bahay ang biktima nang pumasok ang dalawang hindi kilalang lalaki kung saan kinompronta ito. Gayunman, pinagbabaril ang biktima habang nakamasid ang kanyang misis na hindi naman idinamay. Tumakas ang gunmen lulan ng motorsiklo habang patuloy naman ang imbestigasyon.