MANILA, Philippines – Pinatatahimik ng isang kongresista ang mga opisyal ng Commission on Elections (COMELEC) na nagbabangayan.
Ayon kay House Committee on Suffrage and Electoral Reforms chairman Fredinil Castro dapat manahimik o “Keep your mouths shuts” sina Comelec Chairman Andres Bautista at Commissioner Rowena Guanzon.
Giit ni Castro dapat na magpakahinahon sina Bautista at Guanzon para mabawi nila ang kani-kanilang composure.
Hindi ang bangayan sa Comelec ang kailangan ng bansa ngayon kundi ang nagkakaisang komisyon para maisakatuparan ang mapayapa at kapani-paniwalang halalan sa Mayo.
Sa halip umano na mag-iringan nararapat na magkaisa ang dalawang opisyal at magkasundo sa kanilang mga hakbang lalo na ngayong nasa kasagsagan ng preparasyon para sa darating na eleksyon.
Para naman kay Castro, nagkaroon ng error in judgement sa panig ni Guanzon ng maghain ito ng komento sa Korte Suprema na umano’y hindi otorisado ng Comelec En Banc.
Hindi naman umano kwestiyon dito kung gaano kagaling si Guanzon kundi ang isyu ay ang pagtayo ng Comelec bilang isang institusyon sa komentong inihain sa Korte Suprema.