MANILA, Philippines – Pito pang kumpanya ng langis sa bansa ang nagpatupad rin ng kani-kaniyang rolbak sa presyo ng produktong petrolyo.
Una nang nagbawas ng presyo ang Petron habang sumunod rin ang Shell at Chevron.
Sa anunsyo ng Shell, dakong alas-12:01 ng Linggo ng madaling araw ang pagtatapyas nila ng P1.45 sa kada litro ng premium at unleaded gasoline, P.70 sa diesel, at P.90 sa kerosene.
Ganito rin ang presyo na itinapyas ng Chevron, PTT, Total Philippines, Flying V, Sea Oil at Phoenix Petroleum kahapon ng umaga.
Kasalukuyang nasa US$42.37 kada “basket price” ang krudo nitong Agosto 28 kumpara sa US$59.46 presyo noong Disyembre 2014, ayon sa Organization of Petroleum Exporting Countries.
Ayon sa marketwatch.com, kabilang sa mga rason ng pagbaba sa presyo ng krudo sa internasyunal na merkado ang pagbagsak ng ekonomiya ng Greece, pagtanggal sa “sanction” sa Iran na nangangahulugan ng pagdami ng suplay, pagtaas ng lokal na suplay ng krudo sa Estados Unidos, pangamba sa pagbaba ng ekonomiya ng Tsina, at pagtaas sa suplay ng mga bansang kaanib ng OPEC.