Pagbuo ng bagong distrito sa Cebu aprub sa Senado

MANILA, Philippines – Pumasa na kahapon sa Senado ang panukalang batas na naglala­yong magbuo ng isang karagdagang distrito sa probinsiya ng Cebu.

Ang panukala ay inihain nina Reps.Wilfredo Caminero, Benhur Salimbangon, Aileen Radaza at Gwendolyn Garcia.

Kapag tuluyang na­ging ganap na batas, magkakaroon ng se­venth legislative district sa pro­binsiya ng Cebu.

Ang nasabing distrito ay bubuuin ng mga munisipalidad ng Dumanjug, Ronda, Alcantara, Moalboal, Badian, Alegria, Malabuyoc at Ginatilan.

Ang bagong distrito ay may populasyon na 200,092 base sa 2010 census ng Philippine Statistics Authority.

Ang mga munisipalidad ng Argao, Dalaguete, Alcoy, Boljoon, Oslob, Santander at Samboan ay mananatiling kabilang sa second legislative district ng probinsiya. Ang mga nabanggit na munisipalidad ay may pinagsamang populasyon na 223,360.

Sa ngayon ang Cebu na pang-lima sa pinakamaraming populasyon sa probinsiya ay may anim na distrito.