MANILA, Philippines - Nananatili pa rin committed sa coalition na pinamumunuan ni Pangulong Aquino ang Nationalist People’s Coalition (NPC).
Ito ang nilinaw ni NPC Secretary General at Batangas Rep. Mark Llandro “Dong” Mendoza matapos lumabas ang mga ulat na susuportahan ng kanilang partido sina Sens. Grace Poe at Chiz Escudero.
Giit ni Mendoza na ngayon panahon na maingay ang mga isyung politikal ay malinaw ang kanilang mensahe na hindi sila humihiwalay sa coalition ng Pangulo.
Paliwanag pa nito, unfair sa mga miyembro ng NPC na napapangunahan dahil lamang sa mga espekulasyon.
Nilinaw pa ni Mendoza na sa ngayon ang kanilang partido ay nagsasagawa pa ng konsultasyon sa bawat miyembro kaya hindi uman makakatulong kung may mga naglalabasang iba’t ibang pahayag at espekulasyon.
Dahil dito kaya wala pa umanong pinal na desisyon ang NPC sa kung sino ang susuportahan sa darating na 2016 elections taliwas sa naunang naglabasan na Poe-Chiz.
Sa ngayon ang malinaw lamang umano sa NPC ay ang patuloy nilang pagsuporta sa Aquino administration at sa layunin nitong good and honest governance.