MANILA, Philippines - Isinailalim na sa kustodya ng Philippine National Police-Criminal Investigation and Detection Group (PNP-CIDG) matapos sumuko na si Masbate Governor Rizalina Seachon-Lanete kaugnay ng warrant of arrest na inisyu laban sa kanya ng Sandiganbayan .
Sinabi ni PNP-CIDG Chief P/Director Benjamin Magalong Jr. na si Lanete ay boluntaryong sumuko sa PNP-CIDG sa Camp Crame dakong alas-8:30 ng gabi kamakalawa o ilang oras matapos na magpalabas ng warrant of arrest sa kaso nitong plunder ang anti-graft court.
Inihayag ni Magalong na ngayong araw (Biyernes) ay ipriprisinta nila si Lanete sa korte upang desisyunan kung saan ito dapat ikulong. Patuloy naman ang pakikipagkomunikasyon ng PNP-CIDG sa sampu pang akusado rin sa kasong kaugnay ng kontrobersiyal na priority development assistant fund.
Nabatid sa Lanete, Sumalpong, Napoles at de Asis ay isinangkot sa maanomalyang paggamit ng Priority Development Assistance Fund na nagkakahalaga ng P 112.29 M mula 2007 hanggang 2009. Si Seachon-Lanete ay kasama sa second batch ng mga mambabatas na kinasuhan ng Ombudsman ng plunder at graft sa Sandiganbayan matapos mapatunayang nakakuha umano ito ng kickback mula sa kanyang PDAF.