MANILA, Philippines - Umabot na sa 30 miyembro ng kidnap-for-ransom groups ang naaresto ng mga tauhan ng Philippine National Police-Anti-Kidnapping Group (PNP-AKG) simula Enero hanggang ngayong buwan.
Ayon kay PNP-AKG chief Senior Superintendent Rene Aspera, kabilang sa mga naaaresto ay si Tyrone dela Cruz at kanyang kinakasamang si Jean Loise Bitoy. Naaresto ang dalawa noong Nobyembre 7 sa Barangay Bahi, Alburquerque, Bohol.
Hinihinalang sangkot si Dela Cruz sa anim na kaso ng kidnapping sa Kamaynilaan at Timog Katagalugan.
Kasama rin sa 30 naaresto si Reccinte Padillo, lider ng grupong sangkot umano sa kidnapping ni Sally Chua noong Hulyo 5, 2013 sa Quezon City.
Naaresto si Padillo noong Oktubre 16 sa Pasay City.