MANILA, Philippines - Pinabulaanan ng arkitektong si Rodolfo Bongato ang deklarasyon ni Mercado na siya umano ang nagdisenyo ng isang rest house sa isang farm estate sa Rosario na sinasabing pag-aari ng pamilya Binay.
Sinabi ni Bongato na pineke ang kanyang pirma sa sinasabing design proposal ng naturang rest house.
Napaulat na ang nakasulat na proposal na isinumite umano ni Bongato sa JCB Farms noong Setyembre 10, 1997 ay iprinisinta ni Mercado sa pagdinig sa Senado.
Sa isang affidavit na petsang Oktubre 30, nilinaw ni Bongato na hindi siya kailanman nagsumite ng naturang proposal at halatang merong pandadaya dahil malayo sa tunay niyang pirma ang lagda sa itaas ng kanyang pangalan.
“I have never designed a rest house for JCB Farms in Rosario, Batangas or in any other location. The signature over my printed name as appearing in the proposal is not mine. It is a clear FORGERY as I have never signed the same,” ani Bongato.
Binigyang-diin ni Bongato sa kanyang affidavit na ang halaga ng nasabing proposal ay hindi normal na presyo na kanyang sinisingil para sa kabuuang serbisyo nito sa pagdedesensyo ng isang buong proyekto.
Si Bongato ang president ng Rodolfo Roque Bongato Architects, dating Rodolfo Roque Bongato & Associates. Miyembro siya ng United Architects of the Philippines.