MANILA, Philippines - Nabigo umano si Vice President Jejomar Binay na sagutin ang mga akusasyon dito kaugnay ng kontrobersiyal na Makati Parking Building at mistulang nangampanya lamang ito sa kanyang talumpati kahapon.
“Wala naman hong sinagot kundi nag-aksaya lang sila ng panahon ng pangangampanya... Akala ko ho 2016 na,” sabi ni Atty. Renato Bondal, nagsampa ng kasong plunder laban sa bise presidente.
Sabi naman ni dating Makati Bids and Awards Committee Vice Chairperson Engr. Mario Hechanova, “10 minuto dun sa sinabi niya, maliwanag na nangangampanya po siya.”
Tiwala naman ang mga nag-aakusa kay Binay na sa lalung madaling panahon ay masasampahan na ito ng kaso dahil matitibay ang hawak nilang ebidensiya laban sa bise presidente.
Panawagan ng grupo ni Bondal kay Binay, na humarap ito sa imbestigasyon ng Senado para doon ipaliwanag ang kinakaharap umano nitong katiwalian.
Samantala, nakakatanggap umano ng banta ang misis ni Bondal mula sa hindi kilalang caller, na ipapa-kidnap at ipa-pa-rape umano ito.
Dahilan upang ang naturang text message ay ireport ni Bondal sa tanggapan ng National Bureau of Investigation (NBI) para maging basehan ng naturang ahensiya sa seguridad nito.
Sinabi ni Bondal, para na rin aniya sa seguridad ng kanyang pamilya, itinago muna niya ito sa ligtas na lugar.