MANILA, Philippines - Gugunitain ng pamilya Aquino ang ika-31 death anniversary ni Sen. Ninoy Aquino sa isang simpleng misa sa puntod nito sa Manila Memorial Park.
Ayon kay Presidential Spokesman Edwin Lacierda, may panawagan din ang Malacañang sa taumbayan na gunitain ang kamatayan ng martyr na si Ninoy sa araw na ito.
Aniya, wala namang makakalimot sa naging kontribusyon ni Sen. Ninoy sa bawat Filipino ng ialay nito ang kanyang buhay para sa demokrasya.
Inaasahang dadalo si Pangulong Aquino kasama ang kanyang mga kapatid, kaanak at kaibigan sa misang isasagawa sa puntod ni Ninoy ngayong umaga.
Samantala, gugunitain din ngayong umaga sa NAIA terminal 1 ang death anniversary ni Ninoy.
Sinabi ni Connie Bungad, tagapagsalita ng Manila International Airport Authority (MIAA), bandang alas -7:45 hanggang alas - 8:00 ng umaga may flower offering na gagawin sa may departure level ng paliparan na susundan din ng isang misa.
Inaasahan darating sa NAIA ang mga kamag-anak at mga miyembro ng August Twenty One Movement o ATOM.