MANILA, Philippines - Mapipilitan pa ring mangutang ang Pilipinas sa domestic bank at international funding institution upang mapunan ang P283.7 bilyong budget deficit para sa panukalang P2.606 trilyong national budget sa 2015.
Ayon kay Budget Sec. Butch Abad, ang kakulangan sa 2015 budget ay uutangin ng bansa sa domestic banks (86 percent) at ang balanse ay uutangin sa international source.
Mas mataas ang 2015 budget deficit kumpara sa 2014 budget deficit na tinatayang nasa P266 bilyon lamang.
Sa kabila nito, nanindigan pa rin ang gobyerno na hindi magpapatupad ng anumang new taxes upang mapataas ang koleksyon sa buwis maliban sa Sin Taxes sa sigarilyo at alak.
Inaasahan ang mas maigting na paniningil ng buwis ng Bureau of Internal Revenue (BIR), Bureau of Customs (BoC) at iba pang tax collecting agencies ng gobyerno upang mapataas pa ang koleksyon nito.