MANILA, Philippines - Isang lalaking kapangalan ni Quezon City Mayor Herbert Bautista ang nasawi matapos itong barilin ng dalawang kalalakihan kamakalawa ng gabi sa Parañaque City.
Dead-on-the-spot ang biktimang si Herbert Bautista, 25, ng 50 Linotype St., 4th Estate, Brgy. San Dionisio ng naturang lungsod, nagtamo ito ng ilang tama ng bala sa iba’t ibang bahagi ng katawan buhat sa hindi pa batid na kalibre ng baril.
Samantala, nagsasagawa pa ng follow-up ang mga kagawad ng Parañaque City Police laban sa mga suspek na nakilala sa alyas na RJ at alyas Davao.
Sa report ng pulisya, naganap ang insidente alas-10:50 ng gabi sa panulukan ng Dr. A. Santos Avenue at 4th Estate ng naturang lungsod.
Sa pahayag ng ina ng biktima na si Delia Bautista, bago ang pamamaril ay nagtungo pa sa kanilang bahay ang mga suspek at hinahanap ang kanyang anak. Galit na galit umano ang dalawa sa biktima sa hindi pa mabatid na dahilan at umalis lamang nang sabihin ng ginang na wala sa bahay ang kanyang anak.
Gayunman, hindi pa nakakalayo ang mga suspek nang marinig ng ginang ang sunu d-sunod na putok ng baril hanggang malaman nito na binaril ang kanyang anak. Hindi pa malinaw kung ano ang posibleng motibo sa pagpaslang.