MANILA, Philippines - Tinuligsa ng mga residente ng Lungsod ng Pasig ang umano’y misteryosong pagpapatayo ng isang motel sa kanto ng Show Boulevard at Danny Floro Street sa Barangay Orambo ng wala umanong kaukulang building permit at ang umano’y kawalan ng aksyon ng city government.
Nabatid na sinimulan na ang demolition ng lumang bahay at isinusunod na rin ang excavation sa itinatayong motel. May backhoe na rin sa loob ng compound.
Dismayado ang mga residente dahil sa pagsuway sa itinalagang tatlong-metro na palugit (easement) ng building at kalsada para sa dadaanan sana ng mga pedestrian sa lugar.
Ayon sa source isang opisyal ng city government umano ang lumalabas na may-ari ng lupang tatayuan ng motel.
Kataka-taka rin na tila nagbubulag-bulagan umano ang city government ng Pasig dahil noong Disyembre 2, 2013 sinimulan ang pagputol ng mga puno sa compound pero hindi man lang umano ito pinapansin ng hepe ng Building Permit.