MANILA, Philippines - Lumantad kahapon ang motorcycle escort ni DILG Sec. Mar Roxas na si PO2 Brian Geollegue na inireklamo ng “verbal abuse†at ipinoste ang larawan sa Facebook.
Si Geollegue, na miyembro ng Highway Patrol Group (HPG) ay inakusahan ni Baste Santos ng panghihiya umano sa kaniyang ama na sinigawan pa nitong “Huwag kang tatanga-tanga†na umani ng negatibong ‘cyber bullying’ sa nasabing pulis.
Dahil sa insidente ay agad na sinibak ni Roxas si Geollegue at isinailalim sa restricted custody sa Camp Crame habang hinihintay pa ang pormal na reklamo ng pamilya ng biktima.
Itinanggi naman ni Geollegue na nagbitaw siya ng maanghang na salita sa lalaking kaniyang nakabangga at sinabihan lamang daw niya itong tumingin sa kaniyang nilalakaran upang hindi makadisgrasya.
Ayon kay Geollegue, nangyari ang insidente sa Sta. Lucia Mall sa Cainta nitong Hunyo 18.
Gayunman, buong pagpapakumbabang humingi ng paumanhin si Geollegue sa kung sinuman ang nakasagian nito upang huwag na umanong makaladkad pa ang kabuuan ng pambansang pulisya.
Binigyan naman ng pamunuan ng PNP-HPG ng 10 araw na palugit ang umano’y nakabangga ni Geollegue na isapormal ang reklamo at kung hindi ay ititigil na nila ang imbestigasyon laban dito.