MANILA, Philippines - Ibinasura ng Court of Appeals Special Second Division ang petisyon ni Andal Ampatuan Jr. na kumukuwestiyon sa desisyon ng Quezon City Regional Trial Court na tanggapin ang testimonya ng isa sa mga testigo ng prosekusyon sa MaguinÂdanao Massacre case.
Sa sampung pahinang desisyon na isinulat ni Associate Justice Manuel Barrios, ibinasura ng CA ang petition for certiorari na inihain ni Ampatuan dahil sa kawalan ng merito.
Idineklara ng CA na ang testimonya ng testigong si PO1 Rainier Ebus ay admissible o katanggap tanggap bilang ebidensya.
Kumbinsido ang CA na mahalaga ang kinukuwestiyong testimonya ni Ebus dahil maaari itong gamiting batayan para patunayan kung nagkaroon nga ba ng sabwatan o conspiracy sa pagitan ng mga akusado sa MaguinÂdanao Massacre case.
Ang tinutukoy na testimonya ni Ebus sa nasabing petisyon ay ang inilahad nito sa paglilitis sa korte na noong November 25, 2009 ay nakita niya si Andal Ampatuan Jr. sa pagpupulong na ginawa sa mansyon ni Datu Andal Ampatuan Sr.
Isinalaysay pa ni Ebus na may pagkakataon din na tinanong siya ni Andal Jr. tungkol sa baby armalite na bitbit nito noong panahon na binaril niya ang ilang mga biktima ng Maguindanao Massacre.
Tinukoy pa ng CA na nabigo ang petitioner na patunayang nagkaroon ng grave abuse of discretion sa panig ni QC RTC Judge 221 Jocelyn Solis Reyes nang magpasya itong tanggapin ang testimonya ni Ebus.