MANILA, Philippines - Tinanggihan umano ni United Nationalist Alliance (UNA) senatorial candidate JV Ejercito ang alok na tulong sa kanya ni Senate President Pro Tempore Jinggoy Estrada na kapatid niya sa ama.
Nabatid mula sa isang mapagkakatiwalaang source na labis na ikinasama ng loob ni Senator Estrada ang pagbalewala ni JV sa kanyang pagsusumikap na matulungan ito sa kanyang kandidatura.
Ayon sa source, sinabihan ni dating Pangulong Joseph Estrada si Jinggoy na tulungan si JV at ang naisip nitong paraan ay ang paggawa ng political ad kung saan e-eendorso nito ang kanyang half brother.
Ikinatuwa naman umano ng dating pangulo ang idea na ito dahil maganda daw na makita ng publiko na magkasama ang magkapatid.
Sinabi pa ng source na itinakda na umano ang shooting para sa nabanggit na political ad at nakahanda na daw ang lahat para sa taping pero hindi umano ito sinipot ni JV.
Samantala, humihingi naman ng paumanhin si JV dahil mali umano ang nakarating na istorya sa kanyang kuya Jinggoy.
“Humihingi ako ng paumanhin kay Kuya Jinggoy kung ang nakaabot sa kanya ay ayoko ng endorsement nya. Hindi po totoo ito. Napaabot po sa akin ang mungkahi na nagnanais siya na maglabas ng sariling advertisement para i-endorso ang aking kandidatura, sino po ba namang kandidato ang tatanggi sa ganun, lalo na at libre?†sabi ni JV.