MANILA, Philippines – Dalawang kilabot na tulak ng droga ang natimbog sa isang sting operation ng Philippine Drug Enforcement Agency sa Negros Occidental.
Sinabi ni PDEA director general Arturo Cacdac Jr. ngayong Biyernes na nadakip nila sina Salic Manabilang y Sultan, 43, ng Bagondan, Cebu City at Noel Odtohan, 51, ng Barangay Zone 1-A, Pulupandan, Negros Occidental.
Nasakote ang dalawang suspek sa isinagawang buy-bust operation ng PDEA Regional Office 6 sa Poloy’s Pension, Bacolod Central Market, Bacolod City, Negros Occidental nitong kamakalawa.
Nasabat mula kina Sultan at Odtohan ang apat na pakete ng shabu na may timbang na 15 gramo at ang marked money na ginamit sa operasyon.
Dinala ang nakumpiskang shabu sa PDEA RO 6 Laboratory Service upang suriin.
Nakakulong ngayon ang dalawang suspek sa back-up 1 Station, Bacolod City, Negros Occidental at nahaharap sa kasong pagtutulak ng droga.