MANILA, Philippines – Sinuportahan ni Senador Loren Legarda ang kampanya ng ilang motorista na huwag gumamit ng mga sasakyan sa loob ng isang buong araw sa isang taon upang kahit papaano ay luminis ang hangin.
Ang "Car-Free Day" ay nakapaloob sa Clear Air Month at nakatakdang isagawa sa Nobyembre 25. Suportado ang naturang kampanya ng iba't ibang ahensiya ang gobyerno tulad ng Metropolitan Manila Development Authority, Department of Environment and Natural Resources at ng lokal na pamahalaan ng lungsod ng Makati.
"It is high time to raise awareness about the effects of burning fossil fuels and the simple solutions we can undertake," pahayag ni Legarda.
Isinusulong din ng namuno sa kampanya na Parnership for Clean Air Inc. ang green public transport system at infrastructures kung saan hinihikayat ang mga mamamayan na maglakad at gumamit ng bisikleta sa mga lungsod.
"Everyone should be made aware that they are responsible for ensuring the quality of the air we breathe. We must ensure that the generations to come will still have access to clean air," ani Legarda. Camille Diola