“PAANO mo nalaman ang Dona Celia KTV, Bro?’’ tanong ni Honor kay Rocky habang patungo sa bagong KTV.
“Sa mga ka-officemate ko. Nagkukuwentuhan sila. Marami raw dancers at mga bata pa. Mga disiotso lang daw.’’
“Sana naroon si Inah.”
“Sana nga naroon dahil ayaw ko nang maghanap. Ipaubaya na lang natin sa PNP at NBI ang paghahanap kay Inah.’’
“Sige Bro. Ako man ay napapagod na rin. Hindi ko na kayang isa-isahin ang mga KTV sa Metro Manila. Para tayong naghahanap ng karayom sa damuhan.’’
“Tama ka Pareng Honor.’’
“Sana makita na natin siya sa Dona Celia. Sana ito na ang last na KTV na papasukin natin.’’
“Harinawa, Bro.’’
Maya-maya pumapasok na sila sa Mabini St. Hanggang tumigil sila sa tapat ng DONA CELIA. Maliwanag ang signage. Bago ang KTV.
Pumasok sila sa loob. Nakakita sila ng bakanteng mesa. Naupo sila. Lumapit ang waiter at tinanong kung anong order nila.
“Dalawang boteng beer at crispy sisig,’’ sabi ni Rocky.
“Bro, parang kinakabahan ako,’’ sabi ni Honor.
“Bakit?’’
“Hindi ko maintindihan.’’
“Uminom ka para mawala.’’
Tumungga sila.
(Itutuloy)