ISANG anonymous customer ng isang restaurant sa Houston, Texas ang nag-iwan ng $9,400 (humigit-kumulang P481,000) na tip ilang oras bago ideklara sa lugar ang sapilitang pagsasara ng mga establisemento.
Nag-iwan pa ng mensahe ang customer kung saan nakasaad na tulong na raw niya sa staff ng restaurant ang malaking tip dahil mawawalan ng sahod ang mga ito sa mga susunod na linggo dahil sa napipintong pagsasara ng restaurant.
Ipinasara kasi ang mga business establishments sa lugar upang mapigilan ang pagkalat ng COVID-19.
Sa pamamagitan ng isang Facebook posts, pinasalamatan ang anonymous customer ng restaurant, na nagsabing nakatanggap ng $300 (katumbas ng P15,000) ang bawat isa sa kanilang mga staff matapos nilang paghati-hatian ang napakagalante niyang tip.