Nabasa ko ang inyong editorial na tumatalakay sa grabeng trapik sa Metro Manila at ang dahilan nito ay ang mga lumang trailer truck na yumayao’t patungong port area. Dahil sobrang dami ng mga truck na ito, inookupa na ang lane pati sa private vehicle.
Ang mga lumang truck na ito rin ang dahilan kaya nagkakabuhul-buhol ang trapiko dahil walang disiplina ang mga drayber. Palibhasa’y malalaki walang patumangga kung ihambalang ang kanilang sasakyan.
Ang mga bulok ding truck ang nagpapagulo ng trapiko sapagkat biglang titirik sa gitna ng kalsada. Bukod dito, nagdudulot ng trahedya sapagkat inaararo ang mga sasakyang nasa unahan o ang mga nakaparada dahil nawalan ng preno. Ilan na ba ang namatay dahil sa mga bulok na truck na dispalinghado ang preno.
Tama lamang ang hakbang ng Department of Transportation na walisin na ang mga lumang truck sa kalsada. Ngayon na ang tamang panahon.
-- LEONARDO MAABAY, Sct. Limbaga, Quezon City