ISANG pirasong sitsirya na may kakaibang hugis ang naibenta diumano sa halagang $99,900.
Ipinost kamakailan lang na kilalang auction site na eBay ang sitsirya na kahugis ng isang gorilla.
Nagsimula lamang ang bidding sa halagang $11.99 ngunit matapos maging viral ang tungkol sa sitsirya ay pumalo sa halos $100,000 ang naging presyo nito bago magsara ang subastahan.
Ipinagbebenta ito ng isang eBay user na kinilala lamang bilang “valuestampsinc” at ayon sa kanya ay napansin niya kaagad ang piraso ng sitsirya dahil sa pagkakahawig nito sa isang gorilla na naging laman ng mga balita noong isang taon.
Ang gorilla na tinutukoy niya ay si Harambe, isang gorilla sa Cincinatti zoo na kinailangang barilin ng mga zookeeper matapos na may maligaw na bata sa loob ng kanyang pinagkukulungan. Naging sikat ang gorilla dahil sa balita.
Wala namang balita kung tinotoo ba talaga ng nanalo sa auction ang pagbili sa hugis unggoy na sitsirya sa halagang $99,900.