SI Susannah Mushatt Jones ng New York ang sinasabing pinakamatandang babae sa mundo. Siya ay 116-anyos na. Isa siyang single. Siya ay bulag at bahagyang bingi. Hindi siya gaanong nagsasalita.
Sabi ni Jones, ang sekreto ng kanyang mahabang buhay ay dahil sa pagkain ng bacon at itlog araw-araw. Tuwing umaga, sa kanyang almusal, nakahain ang bacon at itlog. Hindi kumpleto ang kanyang araw kapag walang bacon at itlog. Una niyang kinakain ang bacon at kasunod ang itlog.
Sabi pa ni Jones, hindi siya umiinom ng alak, hindi naninigarilyo at hindi rin mahilig sa party o mga pagtitipon. Hindi rin daw siya nagme-makeup at nagkukulay ng buhok. Natutulog daw siya ng 10 oras.
Sabi pa niya, isang dahilan din kung bakit mahaba ang kanyang buhay ay dahil sa pagiging single. Sapat na raw kasi sa kanya ang pagkakaroon ng 100 pamangkin na nagpapaligaya sa kanya.