NAGPATULOY si Levi sa pakikinig kina Sam at Viring. Nabuksan sa kanya ang isang lihim ni Sam --- paghihigantihan pala siya nito!
Halos idikit niya ang taynga sa pinto para marinig pa ang pinag-uusapan ng dalawa. Hindi siya gumagawa ng ingay.
“Pasensiya ka na Senyorita Sam kung tinawagan ko si Sir Manuel at ipinagtapat ang mga naoobserbahan ko sa’yo. Hindi ko po talaga matiis na hindi niya malaman ang nangyayari rito.’’
“Nauunawaan kita Viring.’’
“Salamat Senyorita. Pero huwag kang mag-alala dahil hindi naman nagalit si Sir Manuel. Naunawaan nga niya ang lahat. Noon pa raw ay naisip niyang maaaring mangyari ang ganito.’’
“Nahihiya ako kay Sir Manuel, Manang Viring. Malinaw na malinaw ang usapan namin noon na hindi ako titigil hangga’t hindi naipaghihiganti ang anak niyang si Ylang-Ylang pero ngayon ay ako itong sumusuko na at sumisira sa pangako.’’
“Sundin mo kung ano ang sinasabi ng iyong isipan, Senyorita.’’
“Nahihiya ako kay Sir Manuel. Marami na siyang nagastos para sa plano na ito. Lahat ay ipinagkaloob niya sa akin – pera, bahay, sasakyan at kung anu-ano pa pero sumira ako sa usapan.’’
“Huwag ka ngang mag-alala, Senyorita dahil naunawaan naman niya.’’
“Gusto ko nang umalis dito, Viring. Babalik na lang ako sa probinsiya namin.’’
“Huwag Senyorita. Wala namang sinabi si Sir Manuel na umalis ka rito.’’
“Parang hindi ko kaya, Manang Viring na dito ako nakatira pero sumira ako sa usapan.’’
“Mag-isip ka muna Sen-yorita.’’
Nakatungo lang si Sampaguita.
“Magtapat ka Senyorita, talaga bang nahulog na ang loob mo kay Levi. Gusto ko lang malaman para naman hindi ako nag-iisip ng kung anu-ano. Kasi’y lagi ko ka-yong nakikitang magkasama. Kahapon, magkasama kayong naligo sa pool. At ewan ko kung naipagkaloob mo na ang sarili sa lalaking iyon.’’
“Hindi pa Manang Vi-ring! Hindi pa!”
“Pero mahal mo si Levi? Natutuhan mo na siyang mahalin?’’
Tumango si Sam.
Napangiti naman si Levi sa narinig sa dalawa. Mayroon siyang iniisip ngayong nalaman na ang sekreto ni Sam. (Itutuloy)