SI Li Chia, isang 51-anyos na lalaki sa China ay may kakaibang hilig. Kung ang ibang tao ay nagpapamasahe sa mga spa o barberya, si Li naman ay nagpapagulung-gulong sa mga hagdanan bilang masahe sa kanyang likuran.
Karaniwang pumupunta si Li sa isang parke na may 30 baitang upang doon magpagulong-gulong tuwing umaga. Gumugulong siya pababa ng mga baitang at pagkarating niya sa pinakababa ay gugulong ulit siya paitaas. Pakiramdam daw ni Li ay para na siyang nagpamasahe sa totoong masahista matapos ang lahat ng paggulong na kanyang ginawa.
Nabuo sa isip Li ang kakaibang paraan na ito nang minsang magpamasahe siya sa isang spa. Kakaiba ang nasabing spa dahil minamasahe nila ang kanilang mga customer sa pamamagitan ng pagpapagulong sa kanila sa ibabaw ng maliliit na mga bato. Nagustuhan ni Li ang karanasang iyon kaya sinubukan niyang gawin ulit ito nang mag-isa ngunit nahirapan siyang makaipon nang mga maliliit na bato na maari niyang gulungan. Naisip niya na gumulong sa mga lugar na may hagdanan bilang masahe sa kanyang likuran.
Ipinaaalala naman ni Li na delikado ang ginagawa niyang paggulong sa mga hagdan kaya babala niya sa mga tao na huwag gagayahin ang kanyang ginagawa. Hindi ito para sa mga hindi batak ang katawan dahil bukod sa tatlong taon na niyang ginagawa ang kakaiba niyang paraan ng pagmasahe ay sanay na rin ang katawan niya sa pag-eehersisyo kaya naman nagagawa niya ng ligtas ang paggulong niya sa mga hagdanan.