Kapansin-pansin na Pilipinas ngayon
Ay ibang-iba na sa Philippines noon;
Sa lahat ng dako sa bayan at nayon
Masamang gawain hari’t panginoon!
Itong kabataan saan mo man tingnan
Nag-iiba na rin sa pangangatwiran;
Di na pinapansin aral ng magulang
Kaya lumalaking walang modo’t galang!
Sa lahat ng dako’y talamak ang sala
Nababale-wala pati ang hustisya;
Tingnan mo na lang itong pulisya
Sila’y hati-hati sa nakuhang pera!
At pati ang batas ng Inang Simbahan
Balewala na rin sa mga tahanan;
Masamang ugali ang pinaiiral
Kaya lahat ngayon ay makasalanan!