Mayrong mga taong hindi kumikilos
Ay namamayagpag sa maraming sulok;
Mga tao silang sa biyaya’y busog
Dahil nakalusot sa mga pagsubok
At may mga taong kahi’t anong gawin
Hindi makawala sa dusa’t hilahil;
Laging nagdarasal sila’y payamanin
Pero sa tuwina;y bigo at bigo rin!
Marahil kung kaya ganito ang buhay
Sinusubok sila ng Poong Maykapal;
Mga nagdurusa’y pinahihirapan
Sa mga nagawa nilang kasalanan!
Subali’t ang taong sapul sa simula
Lalo nang panahong sila’y mga bata;
Laging masunurin matapat sa kapwa
Ngayong tumanda na sila’y pinagpala!