Ang lahat ng tao’y nilikha ng Diyos
upang sa Kanya ay sumamba’t maglingkod;
Mayrong nagdarasal na tapat sa loob
at may sumasambang kaaway ng Diyos!
Saka ang problema mga tao ngayon
iba’t ibang diyos pinapanginoon:
Tingin sa sarili higit pa sa gayon
kung kaya marami ang nagiging busong!
May mga tao pang ang mga pangaral
ay waring saliwa sa magandang asal;
Ang utos ng Diyos sila ay magdasal
dinadasal nila’y pansarili lamang!
At ang masama pa sila raw ay anak
ng totoong Diyos may mabuting balak;
Nagtayo ng kanyang relihiyong bulagsak
sapagka’t pera lang ang talagang hangad!